فن اليأس

ارجوكم لا تتبعوني !  أنا عارف اني واحد من الناس اللي كتاباتها بتوجع  واني مش من اللي بيكتبوا كتابات متفائله وورديه ومريحه . . عارف ! وقد يكون ده لاني شايف ان فيه غيري كتير قايمين بالواجب الوطني ده !  ومن الواضح كمان ان الفترة القادمه ستشهد هزائم متتالية للثورة بعد ان تأكد الجيش ان اغلبية الشعب المصرى إختار التصويت للاستقرار و طابور العيش ولا تفرق معاه كثيراً قيم "الحرية والكرامة" في مقابل قيم "الاستقرار والسلامه" حتي لو زٌيَّف له هذا الوعي علي ايدي المنتفعين وبعد ان اظهر المصريين قدرتهم الفطريه العجيبه علي الاستسلام الإختياري وغير المشروط لاكاذيب تجار الدين وترهاتهم حتي لو اضر هذا بمصلحتهم و المثل بيقولك الى تعرف ديته اقتله و الجيش وبياعين الدين عرفوا ديتنا و جارى قتلنا

قدرك يا مصر بكل أسف ان تحكمي بدستور قديم اسمه حاميها حراميها وان يكون هذا هو الدستور الحقيقي لحكمك، وطالما تلك هي  القاعدة الذهبيه للحكم فيكي يابلدي يبقي توته يا حدوته و كما كنت لان كل اللي جاي سيكون تنويعات "ملتوته" علي ألحان قديمه وحمضانه لاتمت لأحلام الثوره القويه الزاهيه بشئ وبالتالي لا تعنيني كثيرا الا بالمتابعه من علي الهامش

الشئ المحزن في هذه الثوره الجميله انها استطاعت ان تداعب الاحلام الكبيره وبالتالي حشدت وراها ناس كانوا واقفين خارج المنظومه . .  ناس احلامها مالهاش حدود .. انا واحد من اللي  شدت الثوره رجلهم و علي قد ما أنا حالم فانا ايضا شكاك جداً من كتر ما شفت من كذب ودجل وباختصار رجلي مابتتشدش بسهوله . وللأسف فعلي قد الحلم مابيكون كبير علي قد ما خيبة الامل في  الفرجه علي ضياع الحلم مابتكون قاتله . . أياك حد يطلع لي يقول ايه اليأس والتشاؤم ده ؟  لما انت تقول كده وغيرك يقول كده يبقي مصر تروح فين ؟ احب اقول  ان  الحالمين الرومانسيين من أمثالي هم اللي كانوا عايزين ياخدوا مصر في حته تانيه أجمل وانظف ولو مره  من نفسها بس سواق التاكسي باعنا لان الاجره مدفوعه مقدما من ناس تانيين . .  غصب عننا وعن اللي يتشدد لنا إتقال لنا الآن مصر المحروسه مش بتاعكم ومصر عارفه كويس قوي هي رايحه فين لأنها راحت هناك ميت مره قبل كده ( زي نفيسه بتاعة فيلم بدايه ونهايه كده )  فماتعمليش فيها وطني ياد انت وهو وسيبوا الكبار يلعبوا واللي حايتظاهر من هنا ورايح حانجرمه بالكانون ونطلع عين امه ! وللأسف بقي فإن كتير تانيين من اللعيبه الحريفه التانيين اللي كانوا واقفين جنبنا في ميدان التحرير كانوا عارفين برضه مصر رايحه فين وحجزوا لنفسهم مكان في القشاش الجاي، عادي جداً . .  ومش بالضروره  ان ده معناه اننا رايحين لما قبل ٢٥ يناير (انا عارف ان فيكم اللي مستني الجمله المريحه دي .. هاها ) ولكنه بالتأكيد ماحناش رايحين برضه محطة ٢٥ يناير لان المحطه دي بالذات بتضايق المحاسيب وحاتكشفهم وتفضحهم فضايح بجلاجل وبلاش اكمل . .  طيب تمام قوي يعني احنا برضه مش وحشين برضه اهو والدنيا حاتتحسن عن الاول . .  صح ؟ صح يافندم بس مرحلياً  وبعدين المنحني حاينزل عن الاول كمان وحاتشوفوا والتاريخ بيقول كده . . اللي ممكن تاخده بجنيه ماتخدوش بجنيه وقرش صاغ
مش فاضل بقي إلا شوية الرومانسيين اللي صدقوا الحلم وكان نفسهم في الحاجه الاكبر والاجمل والأشمل : هارد لاك يا جماعه ! معلش انتوا الدور ده مش بتاعكم  وده لانكم ماكنتوش عارفين أن احلامكم اكبر من حدود الواقع العفن اللي رجلكم مغروزه فيه للركب حتي لو كانت راسكم طايره في سابع سما .  الواقع المرير بيقول انه لا الدفه ولا المركب ولا مفتاح الكرار عمرهم حايكونوا من نصيب الشعب المنحوس ده . . ده وهم  . . وده كذب . . انتهي ! واللي ماعرفش كده لغاية دلوقتي يروح يسأل حاميها وحراميها

لغز عبود الزمر

شاهدت برنامج العاشره مساءً وأذاع لقاءاً مع عبود الزمر احد اعمدة تنظيم الجهاد السلفي الذي نفذ عملية اغتيال انور السادات وذلك بعد الافراج عنه منذ أيام بعد ٣٠ عاماً قضاها في السجن . ومنذ خروج الزمر وأنا ألحظ اهتماماً اعلامياً  ملفتاً بهذا الشخص مما جعلني اشك في وجود اتجاه "لتلميع" الجماعات السلفيه لسبب ما ، تلك الجماعات التي تعتنق من ضمن ماتعتنقه مبدأ التصفيه الجسديه لمن يخالفهم الرأي عملاً بفتاوي يطلقها ممن يسمونهم "برجال العلم" وهم شيوخ لهم آرائهم المتزمته يتبوأون مكانة " لاتمس ولا تناقش" اسوة بالمكانه التي يحظي بها ملالي ايران

نظرت الي الزمر والي لحيته الطالبانيه المتحنيه اللي طولها شبرين وشويه ووجهه المتورد يملأ شاشات قنوات كانت تدافع عن النظام وتشكك في الثوره حتي اسابيع ماضيه ووجدتني افكر :  هذا التلميع مقصود وقد يكون هدفه الواضح هو بث الرعب لدي الرأي العام الذين سيملأه الاستياء عندما يري قتلة السادات يعتلون المنابر الإعلاميه ولا يجدون حرجاً في الإستمرار في الدفاع عن فتاوي التصفيه الجسديه طالما ان "رجل العلم" الذين يمشون ورائه هو الذي يفتي لهم بالقتل ويفتي "عن علم مش اي كلام كده" علي حد قول الزمر !! أنا اسمع الآن صوتاً خفياً ينعق من وراء الستار : كنتم عايزين ثوره ؟ طب اتفضلوا شوفوا الثوره جابت لكم ايه

و بالطبع فان الأغلبيه الساحقه للشارع المصري سوف ترفض الزمر والتيار الذي يمثله مما يجعلهم يفاضلون  في النهايه بين اتجاهين

الاول الإرتماء في احضان الاخوان المسلمين ( رهان امريكا المحتمل في رأيي ) باعتبار انهم برداً وسلاماً بالمقارنه بنار التزمت ويمثلون "الاسلام  الجميل المعتدل" في مواجهة غلو السلفيه الكريهه اللي استشفه الناس من لقاءات الزمر ومنهج تفكيره حتي وان ادعي تخليه عن مبادئ العنف، فالرجل اوضح بجلاء انتهاجه لسياسة "الخطوات التكتيكيه المرحليه" والتي تعني عدم الاستناد في تحركاته الي مبدأ ثابت وانما إعطاء الأولويه للإحتياجات السياسيه المرحليه حتي وان خالف ذلك قناعاته الدينيه الثابته وفي هذه الحاله يجب التعامل معه فوراً كرجل سياسي يتملكه طموح ميكيافيلي للسلطه والا يصدع رؤوسنا بالكلام عن الدين لانه في واقع الامر يوظفه كسلم يصل به  الي كرسي الحكم ، مثله في هذا مثل الإخوان المسلمين

اما الاتجاه الثاني فهو إضعاف التيار الاسلامي الذي كان يمثله حصرياً - حتي الإسبوع الماضي - الاخوان المسلمين وشغلهم في صراع سياسي جانبي مع التيار السلفي الذي ظهر لهم من تحت الإرض و يصرح علناً عن رغبته في الترشح للرئاسه متمثلاً في شخص السيد عبود الزمر . هذا الوضع الجديد سيضرب الطرفين ببعض ويلهيهم عن التركيز وتنظيم الصفوف ولو مرحلياً وربما ينخرطون في صراعات جانبيه تحد من فاعليتهم ونتال من مصداقيتهم لدي الناس وهو تكتيك لئيم و "ساداتي" جداً يذكرنا بقرار اتخذه السادات تقوية شوكة الجماعات الاسلاميه في اوائل السبعينات بهدف ضرب التيار الناصري والتيار اليساري بعد وفاة عبد الناصر لتخلو له الساحه للمرور بسياساته المواليه لأمريكا . ومن ناحيه اخري فان فتح ماسورة السلفيين علي الشارع المصري وإغراقه بالغوغائيه السلفيه الكريهه من المحتمل جداً ان يؤدي الي تلويث فكرة الخيار الديني لدي الناس وفضح مطامع من يمثلوه  لدفع الرأي العام دفعاً نحو خيارالاحزاب المدنيه عملا بمبدأ السلامه

وهنا بيت القصيد: ينشغل الدينيين ببعضهم البعض ويصوت المصريين بنعم للتعديلات الدستوريه بما يعنيه ذلك من حرمان شباب ثوره يناير وغيرهم من القوي السياسيه الفاعله لتكوين احزاب سياسيه قويه وقادره علي المنافسه الجديه سواء برلمانياً أو رئاسياً نظراً لضيق الوقت عندها فبلا شك ان المرشح الاول لملأ الفراع السياسي للقوي المدنيه سيكون هو الحزب الوطني الذي لازالت آلياته موجوده وجاهزه للدوران مره ثانيه لتخدم عودة الحزب تحت مسمي جديد وشعار جديد ينضم تحت رايته المستفيدين من رجال الاعمال وراقصي كباريه النظام السابق ممن يجلسون علي الخط وينتظرون بفارغ الصبر صفاره الرجوع

علل مايأتي

- إفراجات  بالجمله الإسبوع اللي فات عن قادة الاخوان المسلمين كخيرت الشاطر ورفاقه وكذلك نشطاء الجماعه وبعدين الاسبوع ده يتم الافراج عن اعضاء تنظيم الجهاد وعتاولة الجماعات الإسلاميه  كعبود وطارق الزمر اللي ماشافوش نور الشمس من ٣٠ سنه بينما امريكا واسرائيل واقفين يتفرجوا من بعيد ومابيقولوش ِبم ولا تتهز منهم شعره علي اساس انهم فجأه مابقوش يخافوا من الاخوان المسلمين ناهيك عن تنظيم الجهاد اصلاً . كمان النظام ( ايوه فيه نظام وشغال زي القرد من شرم الشيخ وعمال ياخد في قرارات علشان ماحدش يقوللي ان القرارات دي كلها طالعه من بنات افكار المجلس العسكري لوحده . . الافراج عن الجماعات الاسلاميه بالكثافه دي ، ده قرار سياسي بحت وليه سبب - مش انساني ولا عاطفي طبعا - وليه وده الاهم صاحب قاعد يخطط ويتكتك ) نبص فجأه نلاقي النظام ده بقي يتعاطف مع اصحاب اللحي والجلاليب والرشاشات وكتب الفريضه الغائبه وتكفير النظام والعيشه علي أم اللي عايشينها وده كله ليه ؟ علشان قال ياعيني فجأه احنا بقينا طيبين وبنقول المسامح كريم واديلو فرصه تانيه بما فينا الست هيلاري كلينتون وسي أوباما . . ديمقراطيه دي ؟ ماشي ..  طيب ممكن افهم الناس اللي لسه خارجه من السجن دي ماخرجتش تطالب بمحاكمة اللي اسمه حسني مبارك ده ليه ؟ مش هو اللي حبسهم وعذبهم ؟ فجأه بقوا طيبين هم كمان ومسامحين الدنيا كلها بعد سنين ورا القضبان ولّا هم عارفين انهم طالعين علي هبره كبيره ؟ عبود الزمر دقنه طويله ييجي تلات اشبار ومتحنيه زي بتوع طالبان وطالع يقول انا مؤمن بالحوار بين كل القوي السياسيه ولا امانع في ولاية قبطي للبلاد اذا اراد الشعب ذلك  ؟؟ لا والله ؟  مش وسعت منك دي شويه يا لوتاننت عبود ؟ انتوا بتستغفلوا مين بالظبط  ؟؟ بقي هي ده الصفقه ؟  قالوا لكم ح نخرجكم من السجن بس بشرط تلعبوا معانا ؟  وانتوا يا جيش ولا يا ساده يا من نصبتم نفسكم اصحاب لمصر ياللي قاعدين في شرم بتديروا العمليات من هناك زي مطاريد الجبل : لما انتوا بقيتوا حاجه جامده قوي كده وخروج المتزمتين الدينيين مش عامل لكم أي قلق خالص كده طيب ايه اللي كان مضايقكم في ال ٣٠٠ عيل أعزل اللي كانوا مكملين اعتصام في التحرير دول  ؟؟ هم دول بقي الخطر اللي بيهدد مصر ؟؟ يعني انتوا شايفين ان رامي عصام بجيتاره اللي اعتقل واتعذب في ٩ مارس بشكل وحشي شايفينه اشد خطراً من خروج  اسلامي متطرف  وظابط مخابرات سابقاً وكان احد المؤسسين والعقول المدبره لتنظيم مسلح قتل رئيساً للجمهوريه وكان يعد العده للانقضاض علي الحكم  . حد يديني عقله 

٢- اصرار المجلس العسكري علي التعجيل بالانتخابات البرلمانيه بالالحاح علي الموافقه علي تعديل كام ماده من مواد الدستور الفاسد مع الحفاظ علي مواد تودي اتخنها شعب ورا الشمس علي ايد رئيس جمهوريته وهذا بدلاً عن صياغه دستور جديد وده عشان يكروتونا وماحدش يلحق يعمل حزب عدل ولا يقدر ينظم نفسه وينافس بنفس القوه اللي موجوده لذي التحالف الاسلامي وبذلك تخلو الساحه امام تحالف اسلامي/سلفي مدجج بآليات وكوادر وامكانيات لوجستيه يرثها عن الحزب الوطني سابقاً تمهيداً لأن يحتل البرلمان القادم باعتباره صوت الاغلبيه

٣- الإستمرار في الإصرار علي التحجيز و عدم الاقتراب من الساده  أعضاء "حزب ممنوع اللمس" ، الساده أقطاب الفساد السياسي كمبارك وصفوت وسرور وعزمي  وبالمره القيادات الاعلاميه والتلفزيونيه الفسدانه علشان دول متشالين لعوزه حاتيجي قريب والاكتفاء بالمحاسبه علي شويه رموز للفساد المالي والإداري من اللي قرروا يدوهم قرصه علي ودانهم علشان زودوها في التجاوزات الماليه وبالمره يالا خلي الشعب يفرح شويه

ايه ده بقي بالظبط ؟؟ هو ده اللي الثوره قامت علشانه ؟؟ اننا في آخر المتمه نقعد نتفرج علي حسني مبارك وهو قايم يهز وسطه من مصر علشان يترزي يقعد بالروب دي شامبر في شرم الشيخ يفطر بكافيار روسي وهو بيهرب في ثروته اللي بالمليارات  في ١٨ يوم بحالهم تحت حراسه مشدده من الجيش اللي عزله عشان يعرف يحرسه ويهدينا بكلمتين في الوقت اللي بيتم فيه تهيئة المسرح علي المدي البعيد لصفقة تم الاعداد لها منذ يوم "التنحي" تقوم علي إستبدال النظام السابق المرفوض شعبياً بنظام  آخر اسلامي سلفي ذو قاعده شعبيه جديده قائمه علي أنقاض ثورة ٢٥ يناير التي "صادروها لصالحهم"  يتشيع من خلاله لليهود والأمريكان تحت غطاء اسلامي معتدل "حايقرفونا بالكلام علي التجربة التركيه الفتره الجايه وحاتشوفوا"   كل هذا تحت رعاية مجلس الاوصياء من اقطاب النظام السابق باعتبارهم الآباء الروحيين سجانين مصر المحروسه وقدرها المشؤوم  اللي حايفضلوا ماسكين خيوط اللعبه لحد مايستلمها النظام الجديد وبعدين نلاقيهم فص ملح وداب ..  واديني باقول اهو وبالخط العريض مالم يجد جديد و ما لم يغير الجيش سياسته دي يبقي عليه العوض في الثوره دي . .  الجواب لحد دلوقتي باين من عنوانه وانا عن نفسي مش متفائل والجيش تصرفاته مؤخراً لا تعطيني احساس بالارتياح . عموماً يا جيش،  انت لعبتها صح وهي شكلها حاتطلع كده في الآخر . . لعبه واتكشفت من بدري

طيب  ايه مافيش حل ؟ أنا بصراحه مش شايف اي حاجه ممكن تتعمل حالياً الا الانقضاض وبشده علي صناديق الاستفتاء يوم ١٩ مارس للتصويت بلا والف لا  علي التعديلات الدستوريه لاجبارهم علي تغيير هذه الوثيقه النجسه اللي اسمها دستور  ١٩٧١ واللي انا بصراحه مش فاهم ازاي قبل طارق البشري علي نفسه انه يشارك في ترقيعها ولست معه علي الاطلاق في حجته بان التعامل مع رِئيس ديكتاتور  واحد اسهل من التعامل مع برلمان قوامه فوق ال ٥٠٠ عضو كلهم ديكتاتورات ، وهذا غير صحيح لانك عندما تعطي رئيساً وتسلحه ضد شعبه بدستور جائر كذلك الدستور "المشموم" الملئ بمواد تعطيه صلاحيات التصرف دون رقيب في كل شئ في البلاد بما فيها رفد البرلمان نفسه بجرة قلم  واعلان حالات طوارئ بل واعلان حروب دون الرجوع للبرلمان. يعني مصيده ومعموله لنا ولكن اذا حدث وقالت الاغلبيه لا فسوف يكفل هذا اعطاء فرصه للاحزاب لكي تتكون وتنشط وتنافس بشرف وقوه في الانتخابات القادمه لكي ياتي البرلمان القادم متزناً وباعثاً برساله واضحه لامريكا : ان مصر ليست ملعباً خلفياً لها تهندس فيه هي منظومه القوي علي هواها وتخلق تحالفات داخليه تخدم  صالحها وأن مصر كذلك ليست عزبه لمن يتولي رئاستها  وان هناك ميزاناً اخر لقوه اللعبه علي الكل احترامه .  اذا استطعنا فعل ذلك فسوف يكون هذا هو يوم الانتصار الحقيقي والاباده الحقيقيه للعهد البائد وسيكون علي امريكا ان تتعامل مع هذا الواقع الجديد ويمكن تبدي تنظر لنا علي اننا دوله محترمه شويه . . مش الدوله اللي قالهم مبارك عليها انه شعبها  مايجيش غير بالضرب بالشلاليت    . . وبعد الاستفتاء  علي الدستور وقبل الشروع في اي شئ اخر
يجب البدء  بكل قوه ممكنه في الضغط  لتسليم اعضاء التشريفه للقضاء لمحاكتمهم وانهاء دورهم تماماً من الحياه السياسيه في مصر

مصر . . واتحاد ملاك مصر

Edit

مصر . . و إتحاد ملاك مصر

by Hisham Niaz on Friday, March 11, 2011 at 10:03pm

كنت احدث صديقة لي عما يجري من تطورات فسألتها السؤال الذي يشغل كثيرين الأن : هو ايه حكايه صفوت الشريف ؟ مش بيقبضوا عليه ؟ هو ماسك علي الشعب ذله ولا ايه ؟ وبالطبع كانت اجابتها انه ليس صفوت وحده وانما اخرين يشكل عدم الاقتراب منهم حتي الأن لغزاً يستعصي علي التفسير، وهنا وجدت نفسي أسافر في رحله الي عالم ماوارء الواقع ، رحله يختلط فيها الواقع ببعض الهلوسه في محاوله يائسه للقفز من فوق حاجز الحاضر الذي يتحدي بغموضه كل منطق وعقل محاولاً استشفاف المستقبل، رحله قد يخطئ فيها ظني وقد يصيب وارجو جاداً ان اكون علي الجانب المخطئ  هذه المره ، واني اكون فعلا باهلوس

أنا اعتقد ان السيناريو الذي تم الاتفاق عليه بين "أولي الأمر" عشية ١١ فبراير كان كالآتي : ان يذهب مبارك دون ان يذهب النظام الذي يمثله والذي هو في الواقع اكبر بكثير من شخص مبارك او اي شخص بعينه، واعنقد ان ما يحدث الان يفتح اعيننا علي حقيقه مهمه وهي اننا اعمينا انفسنا بالنظر الي اسامي الاشخاص دون النظر الي أدوارهم الحقيقيه، ففي احيان كثيره يمكن ان يذهب شخص ما باسمه وبدوره معا وفي احيان اخري يذهب بالاسم فقط لكن يبقي دوره باقياً . . ومن قراءة الاحداث منذ تنحي مبارك استطيع ان استشف بعض من المعاني من وراء هذا التسلسل

 أولاً : ان تكون كل الاسماء اللي تم يضحي بها وتقدم للنائب العام هي لشخصيات يا إما كانت مستفيده ( عز، جرانه، المغربي، ابو العنين، حسين سالم ، الخ ) أو منفذه لأوامر ( العادلي، اسماعيل الشاعر، انس الفقي .. الخ ) ولكن بشرط عدم المساس باعمدة النظام ومهندسيه وآبائه الروحيين أو من اسميهم انا "إتحاد ملاك مصر" من امثال صفوت وسرور وزكريا عزمي ومفيد شهاب وجمال مبارك وحلف سوزان مبارك/ فاروق حسني  ثم طغمة رجال الاعمال من مثال ابو العنين وابراهيم كامل "و ربما من ورائهم المشير طنطاوي ؟ ارجو حد يكذبني ويشيل الشكوك دي عني "  الي اخر قائمه "ممنوع اللمس"  المستفزه هذه . . ففي الوقت الذي تتم فيه محاسبة كثيرين من المتجاوزون مالياً فأننا نجد ان فاروق حسني محسوب وشريك الست الهانم ماحدش قادر يتجرأ وييجي ناحيته حتي بعد ما اشيع عن تورطه في فضيحة سرقة الآثار مما يعني ان الست الهانم لسه شغاله من ورا وماسكه ربطة المعلم بقبضه من حديد . . باختصار يعني
المحافظه علي الاعمده الاساسيه " للنظام " وإلهاء الرأي العام ببعض عمليات اعتقال تمتص غضب الناس ولكنها لا تصيب النظام في مقتل وذلك بقص السيقان والفروع وابقاء الجذور مع تجنب الرد علي اي مساءلات تتعلق بهؤلاء الاشخاص بعينهم

  ثانياً: امتصاص حدة الثوره واجهاضها بهدوء علي يد أحمد شفيق بإنتهاجه سياسة المماطله والبطء في الاستجابه للمطالب مع العمل علي ضمان استمرار الفوضي الامنيه حتي يكفر المواطن العادي بعملية التظاهر التي كلفته الكثير من ماله وامنه الشخصي فيصبح رد فعله التلقائي عند سماع دعوه اخري للتظاهر هو الاستهجان بها وجعله يفكر الف مره قبل الخروج للشارع ثانيه خاصه وقد ساعد علي هذا ان البعض ممن لا شغله وراهم ولا مشغله قاموا بافتراش المخيمات في التحرير وتسببوا في خلق شبهة تحوله لمأوي للعشوائيات او حتي لوكر من اوكار الرذيله (بما اشيع عن العثور علي ساقطات داخل تلك المخيمات) وربما كان السماح بتواجد هؤلاء امراً مقصوداً الهدف منه تلوبث سمعة مرتادي الميدان بشكل عام لفترة قادمه والتشويش علي المواطن العادي في موقفه تجاه "مخيمات التحرير" التي ارتبطت عنده حتي وقت قريب بمعاني الوطنيه والإصرار وبقدرة قادر تم تسخيف رسالتها ومسخها الي شئ اخر لاعلاقة له بالوطنيه ولا بالنضال تقوم الشرطه العسكريه بازالته بالقوه الجبريه ويصفق لها الشعب ثم يتنفس الصعداء لزوالها. هل بمقدور المواطن العادي في المستقبل الحكم علي جدية عمليه الاعتصام في التحرير بدقه ؟ ام ستلصق بها تهمة التشرد والبغاء بل ولربما نراهم يسنون لها القوانين التي تجرمها لتقوض بذلك لدي المواطن احد اهم ادواته الاحتجاجيه وهي التظاهر والاعتصام و الذان سيصبح قمعهما بالقوه في المستقبل امراً سهلا استناداً إلي ان اي متظاهر في المستقبل هو واحد ماوراهوش مسئوليات واي معتصم ده واحد لاجئ وعايز يهيس ويرتكب فاحشه وهو مني عين أعداء الثوره الذين يتربصون بها ويتصيدون الفرصه للانقضاض علي مكاسبها ويريد لهذه القناعه ان تستقر في وجدان المواطن العادي الذي يشكل عند خروجه من بيته للتظاهر قوه ضاربه تشكل خطراً لا يستهان بها لدي النظام   . أعتقد ان هذا الهدف الخبيث قد تحقق الي حد كبير والدليل علي ذلك قلة عدد من خرجوا اليوم ١١ مارس الي ميدان التحرير علي الرغم من وجود اسبوع حافل من قبله توجته بلطجة امن الدوله وانتشرت فيه العمليات المهندسه خصيصاً لاشعال الفتنه الطائفيه عاني منها المسيحيين . . تلك الاعمال التي الفناها جيداً و نعلم علم اليقين انها تحمل علامه تجاريه مسجله مكتوب عليها : من صنع النظام

ثالثاً : ولكن ماذا عن عصام شرف ؟ ألا يدل هذا علي جدية المجلس العسكري في إحداث نقله حقيقيه ؟ ليس بالضروره ! ولأكن محامي الشيطان لفتره ولكني واود في البدايه ان اؤكد انني لا اشكك في صدق ووطنيه د. شرف فهو رجل فوق الشبهات من الآخر الراجل ده "يعمل قلق" لأحد حد عايز يمشي عوج . ماذا يدعو إذن  "إتحاد الملاك" الي الموافقه علي إتخاذ قرار كهذا ؟ الإجابه : انهم مضطرين ، فأحياناً ما يضطر السارق الي اللجوء الي طبيب حقيقي يفهم جيداً عمله ويخلص له لكي ليعالج له البقره التي يحلبها ويسرق خيرها كل يوم قبل ان تنفق منه ولا يجد شيئاً يسرقه

 لقد فشل شفيق في إكتساب شعبيه تضمن له المصداقيه وذلك لغبائه وعنجهيته في التعامل مع الضمير العام للشعب ومع ظهور علامات الانهيار الكامل بفعل الفوضي التي امتدت الي العمق المصري والتي تسبب فيها النظام بتعمده استمرار تغييب الشرطه عن الشارع لثلاثة أسابيع كامله بعد أن تواري الحبيب العادلي وراء قضبان حديد عز مما لا يدع مجالاً للشك ان من اعطي الاوامر للانسحاب في ٢٨ يناير لم يكن العادلي وحده وانما هو شخص اخر لا يزال حراً طليقا بيننا ولم يعتقل بعد، هل هو اتحاد الملاك إياه ؟ اي كانت هذه الجهه فقد ظهرت الحاجه الملحه لإنقاذ الموقف ولذلك تمت الموافقه علي استقدام د. عصام شرف الذي يحظي بتأييد الشعب وشباب الثوره ليقوم بتلك المهمة الصعبه وهي لملمة الفوضي واتخاذ اجراءات تمنع الانهيار الاقتصادي التام وتحقيق اصلاحات داخليه تهدئ الوضع داخليا وفي نفس الوقت تقضي علي مسببات حدوث هياج شعبي كالذي شهدته مصر في ٢٥ يناير وهي كلها مهام صعبه وتتطلب اخلاصاً وتفانياً لا يعرف الساده  أعضاء "مجلس الأوصياء" شيئاً عنه ولا يدخل في منظومتهم أصلاً

 رابعاً : أخشي الآن ان تكون الخطه هي انه بمجرد احراز شرف لهذه الاهداف ان تتم تنحيته هو ووزارته جانباً بكتف قانوني علي اساس انها وزاره انتقاليه ثم الاتيان بوزاره اخري يكون ولائها الحقيقي والغير معلن لأجندة الأباء الروحيين وسادة لنظام اياه تمهيداً لظهور "نظام" رئاسي - برلماني جديد يدين بالولاء لاتحاد ملاك مصر ومن فوقهم ماما امريكا والخاله اسرائيل . . ساعتها لن يكون مهماً ظهور صفوت او سوزان او سرور ولا يحزنون فقد تمت ترقيتهم واعتماد اوراقهم منذ زمن  لدي "الشريك الامريكي" باعتبارهم "مقاولون لهم من الباطن" ضمنوا لهم استمرار النظام العميل وحصلوا علي صك من "الجيش الطنطاوي" بعدم المساس بهم في مقابل ان يرعوا انتقال السلطه الي النظام الجديد فارين بعد ذلك بجلدهم وثرواتهم  بينما يرسي فراودة النظام الجديد دعائمه في مصر المحروسه مكونا كوادر جديده قوامها اخس العناصر وادناها وأكثرها عمالة لاسياد الدولار والشيكل والتي سيشكل النواة الجديده  "لاتحاد ملاك مصر القادم  " وهكذا تكون قد مصر أبدعت كعاتها واذهلت العالم ثانية بإفتكاسها لآليه فريده من نوعها تضمن تسليم راية الحكم المشبوه من يد الي اخري وتدوالها بين المحاسيب دون ان تصل في واقع الامر لايدي الشعب الذي سيرضي ببعض العدل الداخلي ويقنع بالخطوتين تلاته اللي كسبهم منصرفاً بعد فتره وجيزه الي امور حياته اليوميه في ظل منظومه جهنميه تأخذ بخناقه تدريجاً وترجعه لمربع واحد من جديد والله يرحم الثوره ويرحم الشرفاء وياعيني علي النزاهه والوطنيه اللي بقوا بيدورا علي أب وأم في مولد الجشع والخسه وانعدام الضمير

الحمد لله . . انقطع الإرسال علي هذا السيناريو الجهنمي بصوت إبنتي : مالك يا بابا سرحان في ايه ومكشر كده ليه ؟ فطمأنتها قائلاً مافيش يا حبيبتي أصلي كنت نايم وحلمت حلم وحش يارب مايتحقق

ياجيش يامصري،  ياسادة يا قادة المجلس العسكري المحترم، يا سيادة المشير طنطاوي :  كلمونا بصراحه وقولولنا انتم ناويين علي ايه وليه بتمشوا بالكوره لحد الجول وبعدين تحطوها  في الأوت . .  وليه سايبننا نأذن في مالطه ؟؟ والله احنا ناس بتفهم ونعجبكم برضه وشعبكم مش أهبل وفاهم اللي حاصل وجاري  . . ايه موضوع الشلة دي اللي مصر كلها اترهن ماضيها وحاضرها ومستقبلها علشان خاطرهم . . عايزين نفض المولد ده بقي يا نقول يالا بينا نبني البلد يا كل حي يروح لحاله والتار يفضل بايت